كـــبــوة جــواد

صعب لامنك فشلت وصعب لامنك لقيت
من يكره نجاحك يدري انك مانجحت

امس ضقت ورحت اقلب ذكرياتي وانتهيت
عند صورة طفل صوته مثل صوتي لا انجحت

وش مثل لا والله الا هذا انا يوم ابتديت
انطق حروف تلعثم في لساني لا انمدحت

هذا انا يوم الحياة بنظرتي عشرين بيت
ومسجدين ومدرسه من طين كم فيها اصطبحت

هذا انا واصبحت اتمتم هذا انا حتى بغيت
اختنق بس القدر عيا على موتي وطحت

وصاح صوت الطفل فيني انت من وين ارتميت
قل انا المستقبل اللي فيك كمم همت وطمحت

امس كنت ابيك تكبر بس والله لو دريت
اني اللي عشت لجله مت عنك واسترحت

لو دريت ان الزمان يجر رجلي ماعديت
ولو دريت ان البحور بلا مواني ما سبحت

كان دربك لي طويل وكل ماشفتك هويت
قلت لك كبوة جواد وماكبيت الا وجمحت

ليه تسمعني وتمشي اااه ليتك مامشيت
وآآآآآه ليتك من كثر عثرات الايام انتصحت

ضاعت احلامي وضل الحزني فيني واهتديت
للطريق اللي يوديني على دمعي ورحت

يالحزن ليتك مثل دمعي وتنزل لا رقيت
بس اعرفك لو مسحت الدمع تبقى ماانمسحت

كان حلمي في وجود انسان يبكي لا بكيت
وصار حلمي في وجود انسان يفرح لا فرحت

كنت اشوف الناس مثلي كل ماجعت وضميت
مادريت ان الاوادم ناس فوق وناس تحت

آآه يا اول ذكرياتي خذني بحضنك نسيت
لا سألك عن وجه ابوي اللي معه ياما سرحت

خذني بحضنك ابغفا يآآآه مبطي ماغفيت
وان لمحت دموع عيني سو نفسك مالمحت

خذني بحضنك وبعثر في جروحي وان قضيت
هز لي كتفي وقلي عيب تبكي لو سمحت

اضحك وعلم زماني من انا ومن وين جيت
طق باب الحزن واصرخ بي لامني فتحت

وضمني يمك وكمل ضحكتك لامن بكيت
ودي اذكر كيف كانت ضحكتي لامن فرحت





تحياتي,, غــلــو

منووره بنت عمووو حبيبت قلبي ماعدمنا هالطله ياقمر